Такое рашэньне з падачы мясцовага краязнаўчага музэю Полацкі гарвыканкам прымеркаваў да Дня гораду, які Полацак адзначыў на выходных. Многія сьвядомыя гараджане ўзрадваліся, бо гаворка пра вяртаньне вуліцы старой назвы вялася яшчэ ад канца 80-х. Напраўду, ёсьць і іншыя меркаваньні. Напрыклад, полацкі краязнаўца Міхась Баўтовіч паведаміў, што будзе пісаць ліст, у якім паінфармуе гарадзкія ўлады, што правільна было б вярнуцца да першапачатковай назвы - Вялікая. “Назва Ніжне-Пакроўская - гэта імпэрская назва, вуліца была так названая падчас першага татальнага гвалту над полацкай тапанімікай, якую зьдзейсьніла расейская адміністрацыя пасьля падзелу Рэчы Паспалітай і захопу Полацка” – піша Баўтовіч.

А вось пісьменьнік Уладзімер Арлоў неаднойчы ў сваіх творах згадваў, што добра было б вярнуць менавіта назву Ніжне-Пакроўская, бо пад такім імем яе памяталі яшчэ старэйшыя пакаленьні палачанаў у дзяцінстве пісьменьніка.

Дарэчы, Полацак – адзінае ў Беларусі места, дзе ў школах ёсьць адмысловы прадмет гісторыі роднага гораду – “Полацказнаўства”. І адзіны ў Беларусі горад, дзе стаіць конны помнік князю, які зрабіў Полацак магутным горадам, - Усяславу Чарадзею.
На мінулых выходных у Полацку адбылося таксама ўрачыстае адкрыцьцё знака Цэнтру Эўропы – яго ўдакладнілі беларускія навукоўцы, а расейскія пацьвердзілі. Цяпер пры наведваньні гораду над Дзьвіной вы можаце займець на памяць сэртыфікат, што былі ў Цэнтры Эўропы.

krynica